Tuesday, March 22, 2005

متى يعلنون وفاة العرب؟ يمكن بكرة

قمة الجزائر ابتدت!! طبعا خبر ممل و بايخ، و طبعا "قمة" مصر و ليبيا يوم الحد أهم بكتير للمصريين و الليبيين و السودانيين و حتى الجيبوتيين. بس مش عارف ليه حاسس ان دي حتكون القمة الأخيرة. عارف ان كل سنة بنقول كدة، لكن برضه السنة دي مختلفة. القمة في حد ذاتها قلتها أحسن طول ما هي اجتماع لتقديم تنازلات جماعية - مع فاصل أو اتنين من "الردح" المتبادل بين الوفود لضمان شيء من الحضور الجماهيري أمام شاشات التليفزيون. المشكلة ان ما كان يسمي بالحلم العربي - أيوة بتاع الأغنية - على وشك أن ينتهي بكابوس. ـ

العرب ولله الحمد يسدوا عين الشمس (270 مليون و العداد بيعد). حتى اللغة و الثقافة و كحك العيد و فوانيس رمضان - اللي بنستوردها من الصين - كل دة لسة نسبيا في أمان. المرحوم المنتظر هو ما يسمى بالنظام - أو اللا نظام -العربي، و على رأسه جامعة الدول العربية. بيتكلموا عن إصلاح الجامعة - ما هو الإصلاح بقى مودة اليومين دول- و إنشاء برلمان عربي!!! أي والله برلمان عربي!!! نطبع مع إسرائيل، موافقة؟ موافقة... نوطن اللاجئين، موافقة؟ موافقة... عجين الفلاحة، موافقة؟ إجماع!! ـ

بس المشكلة ان ماحدش مستني لا الموافقة ولا الإجماع. هو فيه حد يقدر مايوافقش؟؟ طيب، طالما الموافقة مضمونة، يبقى ليه بقى وجع الدماغ و رايحين القمة و جايين من القمة، و فلان انسحب من القمة و علان واخد على خاطره و مخاصم القمة؟؟ و بعدين في النظرية الرأسقراطية (الرأسمالية الديمقراطية) الزبون دايما على حق، و الزبون زهق من موضوع القمة ده. ممكن من باب التجديد شوية دول تروح اجتماعات الكويز، و شوية تانيين يروحوا اجتماعات الشراكة الأوروبية، و الباقيين يبقوا يقروا لنا الفاتحة على أنقاض الأوبك. ـ

يعنى الخلاصة ان موضوع العروبة ده كان غلط في غلط؟؟ مافتكرش. أصل في وسط التكتلات دي كلها، مين اللي حيرضى بينا؟؟ حنجري ورا الإتحاد الأوروبي زي تركيا؟؟ ولا حنفضل تحت الحماية - بلا مبالغة - الأمريكية؟؟ و
طبعا الشرق أوسطية مشروع جاهز.. موافقة؟؟

2 Comments:

At 1:26 AM, Blogger wa7ed mn masr said...

و أخيراً و لا اخر
أخلاقنا بتتاخر
و مهازل
و مساخر
و هزيمة
و تضليل

أحمد فؤاد نجم

 
At 7:09 PM, Blogger Lasto-adri *Blue* said...

مواقفة
هاهاهاهاها

عندك النكتة دى
هشششششش
محدش يتكلم
محدش يتحرك
محدش يتنفس
....
العرب نيميييييين

 

Post a Comment

<< Home